"പൊള്ളാത്ത തവളകൾ !! "

                                                   ....................................... 

ജർമനിയിലെ ഒരു ശാസ്ത്ര പരീക്ഷണശാലയാണ്. വർഷം 1869. ഫ്രീഡ്രിക് ഗോൾഡ്സ് എന്ന ശാസ്ത്രജ്ഞൻ അതിവിദഗ്ധമായി ജീവനുള്ള തവളയുടെ തലച്ചോറ് നീക്കം ചെയ്തു. തലച്ചോറ് നീക്കിയ തവളയെ സാവകാശം ഒരു പാത്രത്തിലെ വെള്ളത്തിലിറക്കി. അത് നീന്തിത്തുടങ്ങിയപ്പോൾ മെല്ലെ വെള്ളം ചൂടാക്കിത്തുടങ്ങി. വെള്ളത്തിന്റെ ചൂട് ക്രമാതീതമായി വർധിച്ചിട്ടും തവള രക്ഷപ്പെടാൻ ശ്രമിച്ചില്ല. ഒടുവിൽ തിളച്ച വെള്ളത്തിൽ അതിന്റെ ജീവനൊടുങ്ങി. ഇതേ പരീക്ഷണം തലച്ചോറുള്ള തവളയിലും നടത്തി. ഇതു തന്നെയായിരുന്നു ഫലം.

 അപ്പോൾ തലച്ചോറ് ഇല്ലാത്തതല്ല വിഷയമെന്ന് ശാസ്ത്രജ്ഞർ തിരിച്ചറിഞ്ഞു.രക്ഷപെടാൻ ഒന്നു ശ്രമിക്കുകപോലും ചെയ്തില്ല തവള . 

കാരണമെന്താണ് ?വെ ള്ളത്തിലെ നീന്തലിന്റെ സുഖത്തിൽ ലയിച്ചു പോയി അത്. അപകടം കടന്നു വരുന്നത് തിരിച്ചറിയുന്നുണ്ട്. പക്ഷേ രക്ഷപെടാൻ ശ്രമിക്കാനുള്ള മനസോ ധൈര്യമോ ഇല്ല. എന്നാൽ തിളയ്ക്കുന്ന വെള്ളത്തിലേയ്ക്ക് പെട്ടന്ന് എടുത്തിട്ടാൽ തവള ചാടി രക്ഷപ്പെടും. 

ബോയിലിങ് ഫ്രോഗ് അഥവാ തിളയ്ക്കുന്ന തവള എന്ന് ശാസ്ത്രജ്ഞർ വിളിക്കുന്ന ഈ പരീക്ഷണ വസ്തുക്കളെപ്പോലെയാണ് നമ്മളും. സ്ഥാപിത താൽപര്യക്കാർ തലമുറകളായി ഓതിത്തന്നത് മാത്രം മനപാഠമാക്കി നാം നീന്തുന്നു. വരാനിരിക്കുന്ന ആപത്ത് തിരിച്ചറിയില്ല. ഇനി അറിഞ്ഞാലും ഇല്ലെന്ന് നടിച്ച് നീന്തിക്കൊണ്ടേയിരിക്കും. അഴിമതിക്കാരും അധികാരമോഹികളും ഒഴിച്ചുതരുന്ന വെള്ളത്തിൽ നിന്ന് രക്ഷപ്പെടാൻ ഒന്ന് ശ്രമിക്കാൻ പോലും മടി. മറ്റ് സാധ്യതകൾ തേടാൻ ഭയക്കുന്നവരോ മടിക്കുന്നവരോ ആണ് നമ്മൾ.  

 സോറിറ്റസ് പാരഡോക്സ് എന്നൊരു പ്രയോഗമുണ്ട്. കൂമ്പാരത്തിനിടയിലെ നെൽമണി എന്ന് പറയാം. വലിയ കൂമ്പാരത്തിൽ നിന്ന് കുറച്ച് നെൽമണികൾ പോയാൽ അതിന്റെ വലിപ്പം  പെട്ടന്ന് മനസിലാവില്ല.

 പക്ഷേ മെല്ലെ മെല്ലെ ആ നെൽകൂമ്പാരം ഇല്ലാതാവും. ഖജനാവ് കാലിയാകുന്നതും അങ്ങനെ തന്നെ. ഇഷ്ടക്കാരെ തീറ്റിപ്പോറ്റാൻ തസ്തിക സൃഷ്ടിച്ചും മറ്റു പല രീതിയിലും ഘട്ടം ഘട്ടമായി ഊർത്തിയെടുക്കും. ചെറുതല്ലേ എന്നു കരുതി നാം കണ്ണടയ്ക്കുന്ന ഇത്തരം കാര്യങ്ങൾ വമ്പൻ നഷ്ടത്തിൽ കലാശിക്കും. 

കൊടും ചൂടിൽ നാം വെന്തുരുകുന്നത് തന്നെ ഉദാഹരണം. മണ്ണും മണലും മാഫിയ കൊണ്ടുപോയപ്പോൾ  നാം കണ്ണടച്ചു. ഇപ്പോൾ പൊള്ളുന്ന വേനലിൽ വിലപിക്കുന്നു. 

               കാത്തിരിക്കുന്ന സർവനാശത്തെ ഇപ്പോഴെ തിരിച്ചറിഞ്ഞ് പ്രതികരിക്കണോയെന്നത് തലച്ചോറുള്ള  സമൂഹത്തിൽ ഓരോരുത്തരും തീരുമാനിക്കേണ്ടതാണ്. നമുക്കു വേണ്ടി മാത്രമല്ല, വരുംതലമുറയ്ക്കു വേണ്ടിക്കൂടിയാണ് ആ തീരുമാനം.

                                          "വെന്തുരുകി നാം മുന്നോട്ട് "              ( Dr. Jacob Thomas)